كواليس قصة هوية "هايدي" وكيف هربت من فخ الأشكال الرقمية الباردة.
أتمنى وصلتك هذه النشرة وأنت بخير💙
أحياناً تشوف هوية جديدة وتحس أنك شفتها قبل، حتى لو ما تقدر تحدد وين. بس الاكيد ان نفس الأسلوب، نفس نوع الخطوط، ونفس التوزيع اللوني كلها ظهرت فجأة في عدد لا بأس فيه من المشاريع.
في حساب دخلته اليوم وجلست اتأمل, يمكن كثير ما ينتبه لانها متفرقة بس جرب ادخل لهذه الحسابات اللي تنشر للمصممين خاصة في الانستقرام ولاحظ التشابه في الأغلب.. احب اقول لك
هذا هو الترند.. ولكن الترند نفسه مو المشكلة. بس إذا صار نقطة انطلاقك بدل ما يكون خيار من ضمن خيارات ثانية أمامك، وقتها يصير مشكلة. فإذا بدأت منه، بتسأل نفسك:
إيش الأسلوب اللي يناسب المشروع؟
وهذا مختلف تماماً عن السؤال اللي المفروض تبدأ تسأله:
عن ايش تعبر هويتنا؟ كيف مفروض تبدو؟
ببسطها لك الحين.. هل مرّت عليك هوية هايدي؟
هايدي يشتغلوا في الرعاية الصحية بالذكاء الاصطناعي وكان أسهل شي يختاروه: شكل رقمي بارد ومستقبلي زي الباقي :) لكنهم بدأو من داخل المشروع
سالفة مشروعهم ببساطة ان التقنية تشتغل بالخلفية وتاخذ كل مهام الطبيب الورقية ان صح التعبير من فورمز وملاحظات يسجلها وغيرها، عشان يركز الطبيب مع المريض وكذا يرجع التواصل الإنساني بين الطبيب والمريض
فهويتهم ما قالت "احنا مشروع تقني طبي" قالت "احنا نعيد المساحة الإنسانية"
إيش السؤال اللي غيّر التوجه؟
الطبيعي تسأل كيف نوري ونقول للناس إن عندنا تقنية متطورة صح؟ هم سألوا إيش القيمة الحقيقية اللي يحس فيها الطبيب والمريض في الغرفة؟ وكانت الهدوء والراحة النفسية لان المريض في وضع لا يحسد عليه والطبيب يعاني من إرهاق الشاشات والطبيب او الممارس الصحي بشكل عام هو المستهدف
وهذا القرار كان المحرك لكل قرار بصري في الهوية:
الشعار هادئ ومتوازن عبارة عن تجريد لحرف H مع مفهوم اللانهائية والترابط، الرسومات مستوحاة من الصوت والماء كتعبير لفعل الاستماع نفسه، أما الألوان فدافئة بدل الأزرق الطبي المعتاد.. تقدر تقرأ عنها اكثر من هنا
كيف تطبقها؟
قبل أي اتجاه بصري، افصل بين شيئين: الشيء اللي يعجبك في السوق والشيء اللي يخدم فكرة المشروع
هذول مو نفس الشي ابدا
بعدها اسأل نفسك إيش القيمة الحقيقية اللي يقوم عليها المشروع؟ القيمة اللي ما بتتغير حتى لو تغير الترند بعد سنتين
إذا عرفت إجابتها، الترند يفقد أهميته لأنك ما عدت تدور على أسلوب يعجب الناس اليوم وصرت تدور على لغة تخدمك بكرة، تحبها فئتك تحديداً وبعدها تسأل.. كيف نحتاج نظهر؟
صل على النبي. ألقاك قريبا إن شاء الله
